السبت، مارس 29، 2008

رحلة مع الخرافات

أصبحنا وأصبح الملك لله .... كلمات جميلة وجميل أن تبدأ بها يومك بعد صلاة الفجر بالمسجد ... شغلي الراديو يا امي ... وتأتي آيات القرآن الكريم عبر أثير الإذاعة بصوت الحصري الجميل الرخيم .. ويتبعها المذيع بدعوات من المأثورعن النبي صلى الله عليه وسلم ... ينادي الوالد : ياإبني تعالى افطر قبل ما تخرج .. مش مهم يا حاج ها أفطر في الكلية .. يا إبني افطر دايما قبل ما تخرج .. دا الندامى ثلاثة ... اللي يخرج من بيته من غير فطور .. واللي تخيب زرعته .. واللي يتجوز جوازة مايلة ... ياحاج الفطور مقدور عليه .. وربنا يستر على الجوازة .. ونغمات أم كلثوم تداعب أذني ..
ياصباح الخير ياللي معانا .. ياللي معانا .. الكروان غنى وصحانا وصحانا .. وفجاة أسمع صوت الكروان فعلا ياتي من أحد الأسطح المجاورة .. ولكن كيف تناغم صوته في نفس الوقت مع صوت أم كلثوم .. ترى هل سمع صوت أم كلثوم فردد شدوها بصوته الشجي .. ياهناه اللي يقوم من نومه حامد ربه وناسي همومه .. سلامو عليكو أنا خارج علشان ألحق القطر .. سلامو عليكو ياجماعة المحطة مالها زحمة النهاردة ؟؟ ماهي زحمة كل يوم .. يعني المحطة زحمة والقطر زحمة وكمان سكشن كيميا عملي ثلاث ساعات بعد المحاضرات .. يعني يوم مشحون .. استعدوا ياجماعة القطر وصل .. كمية من الأتربة أتى بها القطار وكأنها تسابقه ايهما يصل المحطة أولا .. وقف القطار واجتمع الركاب أمام الأبواب كل يحاول الدخول .. يتصارعون .. يتدافعون .. وأبواب القطار كقبر جماعي يلتهم من يدخله .. وأحسست بدفعة قوية في ظهري من أثرها وجدتني داخل القطار ( ازاي ما أعرفش ) .. يانهار ابيض مقد فاضي .. في هنا حد يا حاجة ؟؟ لا ياإبني اتفضل .. جلست بجوار سيدة طاعنة في السن بملابس سوداء وأمامها سيدة أخرى بنفس الملابس .. شاي شاي شاي .. ساندوتش .. حد عايز فلوس سلف ؟؟ في ايه يا ركاب الشاي ها يبرد قبل مايشتري حد .. نعناااااااااع عطر بقك يابيه .. يا ست خدي ابنك جنبك .. القطر ماله النهاردة ؟؟؟
تعرفي ياأختي أنا بنت أختي عدوك وزنها كل يوم يزيد عن اللي قبله .. وزنها زاد عن 100 كيلو وهي لسه بنت ثمان سنين .. ومش عارفين نعمل معاها أيه .. دوخنا على الدكاترة وما فيش فايدة .. كان هذا الحوار بين السيدتين .. واستمر الحوار فاسترقت السمع لا يشغلني إلا صوت عجلات القطار على الشريط الحديدي .. طك طك .. طك طك .. طك طك ... ولما الدكاترة مش نافعين يمكن عندها بسم الله الرحمن الرحيم .. بره وبعيد .. ما تزوّروها .. نزوّرها أيه ياأختي ؟؟ زوّروها المشايخ .. أبو السعود دا سره باتع قوي .. ولا كنيسة العدرا في الزيتون .. وماله نجرب وإن ما جابش نتيجة نعمل أيه ؟؟ ما فيش غير الزار .. أنا عارفة كودية زار إنما لهلوبة ها أكلمها ..
يا خبر أبيض وما فائدة الكيميا ء التي ندرسها .. وما فائدة الطب ؟؟ إذا كانت كودية الزار والمشايخ والكنائس ستعالج المرضى .. هكذا هتفت بي ظنوني ولم يرحمني منها غير ( كوع ) قانوني من احد زملائي قبل ما تخبرني ظنوني أن الكيمياء ليس لها فائدة .. ياإبني ها ننزل أنت ما صدقت قعدت .. معقول ما زال هناك أناس يعيشون في الخرافات وقد اقتربنا من الألفية الثالثة .. ونزلنا من القطار كأننا نولد من رحم ام تلد عدد لا متناهي من التوائم ...

هناك 3 تعليقات:

نهر الحب يقول...

اعلق اناا بقى
بص يا سيدى اولاالسمنة واطبائها للاسف فى كتير منهم يتعاملوا بمبدا التجارة اللى ينفر الناس منهم
وانت بتتكلم عن ناس شكل حالتهم المادية متواضعة

ثانيا الجهل والفقر
والبحث عن حل سريع
كل دى اسباب ممكن تؤدى للبحث عن زار
كمان الثقافة والمتوارثات الغلط
وشكلى انا عملت بوست لوحدى

سورى على الاطالة
كل الاحترام لك
وشكرا على تشريفك مدونتى

نهر الحب يقول...

نسيت اقولك انه بوست حلو خالص
واسلوب سردك جميل

بالتوفيق

جني يقول...

نهر الحب الريحانة .. مرحبا..
اشكرك عل التعليق الجميل..
للأسف الشديد هناك الكثير من الأفلام والمسلسلات والتوك شو التي تتناول الخزعبلات وأحوال الدجالين والمشعوزين أصلت هذه الأمور في أوساط ليس الفقراء والجهلاء وفقط ولكن في أوساط بعض المثقفين وأحيانا من النخبة ..بالإضافة إلى الموروثات الشعبية ..
لكي الشكر وتحياتي