الأحد، فبراير 01، 2009

عواد عشرين عشرة ( 2010 ) ....

تحديث : انتظروني مع فرنسا والرايق والضاحكون يوم الثلاثاء القادم 10 /2 والتدوينة الضاحكة : السلطانية ... اضغط اللينك http://faransaraayek.blogspot.com/
عواد باع أرضه .. زمان وإحنا صغار سمعناها وغنيناها ..
وإحنا كبار فهمناها .. فهمنا أن الأرض هي العرض .. هي الشرف ..
هي أمي وأبويا وأخويا وابني ..
هي أهلي وناسي وعزوتي ..
هي الطيبة السخية الحنونة..
هي الجميلة الأصيلة العفية ..
هي السمرا البهية المليانة حنية ..
هي الضحكة الحلوة .. ضحكة ولادي ويا القمر ..
هي فرشنا وغطانا وشمسنا ودفانا ..
هي النسيم العليل والليل والسهراية..
هي الجميزة والتوتة والضلاية ..
هي الجناين والخضرة والزرعة والمية ..
هي البرسيم والقطن والفول والغلة ..
هي زقزقة العصافير وتوحيد اليمام ودعا الكروان ..
هي اذان على المدنة بيقول الله اكبر .. والارض باقية ..
هي الفاس والمحرات والنورج والساقية ..
هي الترعة والمسقى والشادوف والقناية ..
هي الشغل والعرق والتعب والعافية ..
هي اللي شبعنا من هواها ومرحنا في ثراها ..
واللي فكر يوم يبعها الشيطان ركبه خسروان ..
وعمله بردعة وحمار .. ومسخرة الزمان ..
ولازم يجيله يوم يرجع ندمان ..
وفي يوم اغبر رجع عواد يتمخطر ..
يوم زي وشه المشلضم المغبر ..
قال الا دونا الا دوا الا تري ..
يلا يا هانم يلا يا بيه ..
خدوا فكرة واشتروا بكرة ..
يلا يا ليفي وأنت يا كوهين ..
واللي يتفرج يشتري بقرشين ..
وباع عواد الأرض .. وفرط في الشرف والعرض ..
بعت عرضي يا عواد .. بعت مستقبلي وروحي ..
بعت الأرض يا عواد .. ويا تري مين اشترى منك ؟
اشترى ليفي ولا كوهين ..
وسلملي على السلام والتنمية ..
قلتلنا ها تاخدوا التمن ..
كام سهم وكام سند ..
قال الهبل ضحكت وبشبشت ..
بسرعة على سويسرا وافتحوا لنا حساب ..
طلع التمن خازوق .. والحالة بقت هباب ..
لا شفنا تنمية.. ولا ولادي اشتغلوا ولا قبضوا مهية ..
داحنا صبرنا لما بقى الفقر أغلبية ..
بعت يا عواد وفاضل أيه ما بعتوش ؟!!
النيل ولا الهرم ولا معبد حتشبسوت !!
خد عيل من عيالي يا عواد ولا تبعشي ..
الواد ها يتعوض والأرض عمرها ما تتعوضشي ..
وانتم يا أهل البلد ليه دايما كدا ساكتين ..
هبوا هبة رجل واحد وربنا المعين ..
عواد مسيره ها يرحل وها يفضلنا ليفي وكوهين ..
وإحنا مش عارفين رايحين كدا على فين ..

هناك 59 تعليقًا:

نهر الحب يقول...

جنى
صدقت قلت ما يقوله كل صاحب لب يقظ
وقلب ينبض بحب الوطن ومن قبله حب الله ورسوله كل قلب فطن لما يدبره اليهود والمنافقين لنا

والله المستعان
قالوا هيرجعوا باقى الارض بالسلام وللاسف الخريطة بتتقلص
قالوا هيحرروالاقصى وللاسف احتلت العراق كمان
القالوا الارض هتبقى خضراء
قلبت حمراء بدماء ابنائنا المسالة بلاتمن
قالوا ولم يفعلوا الا العكس

ماما أمولة يقول...

اشترى ليفي ويا كوهين ..
وسلملي على السلام والتنمية ..
وقلتلنا ها تاخدوا التمن ..
كام سهم وكام سند ..
قال الهبل ضحكت وبشبشت ..
بسرعة على سويسرا وافتحوا لنا حساب ..
طلع التمن خازوق .. والحالة بقت فقر هباب ..


ياريت على الفقر وخلاص

لا دول جابوا لنا المرض ولاولادنا

عملوا بلادنا مدافن لنفاياتهم

وحسبنا الله ونعم الوكيل


ربنا المستعان

تقديري

سمكه واحده يقول...

كلام صعب اوي يا استاذ جني
اه والله عندك حق
عواد باع ارضه شوفه طوله وعرضه
طب وبعدين؟
ده كل حاجه بقت هباب استغفرالله العظيم لا بقي في عقول تفكر
كله بقي يفكر في المم بس ويهوا الناس
بالفقر والامراض ومشاكلنا وبلاوينا
هنقول ايه ولا ايه
الله المستعان

mahasen saber يقول...

اه منها الخصخصه هيا اليى هتبيع الشعب هدومه

mohamed ghalia يقول...

بعت يا عواد وفاضل أيه ما بعتوش ؟!!
النيل ولا الهرم ولا معبد حتشبسوت !!
خد عيل من عيالي يا عواد ولا تبعشي ..
الواد ها يتعوض والأرض عمرها ما تتعوضشي ..
وانتم يا أهل البلد ليه دايما كدا ساكتين ..
هبوا هبة ولد واحد وربنا المعين ..
عواد مسيره ها يرحل وها يفضلنا ليفي وكوهين ..
وإحنا مش عارفين رايحين كدا على فين ..
رايحين على فين؟؟؟؟؟؟؟؟؟؟؟؟؟؟؟؟؟
باقى يبيعوا البنى أدمين
دمت بكل الود أخى

حسن حنفى يقول...

للاسف فعلا احنا مشعارفين رايحين علي فين واخره كل ده ايه

نور الاسلام يقول...

وانتم يا أهل البلد ليه دايما كدا ساكتين ..
هبوا هبة ولد واحد وربنا المعين ..
عواد مسيره ها يرحل وها يفضلنا ليفي وكوهين ..
وإحنا مش عارفين رايحين كدا على فين ..المشكله انى الناس بتقول اللى نعرفه احسن من اللى منعرفوش .فعواد كويس احنا عارفين اللى هيجى غيره هيعمل ايه؟

محمد الجرايحى يقول...

أخى الفاضل : أ / سيد
السلام عليكم ورحمة الله وبركاته
مع كل الأسف إحنا كلنا عواد
لأننا سكتنا على بيع الأرض والعرض

عالم حبيب يقول...

الله المستعان

الكلمات جميلة ومعبرة

والله يصلح الحال

علي محـمــــــد يقول...

السلام عليكم

اخي العزيز جنّي

اتمنى ان تكون بصحه جيده ..

بالنسبه للتعليق على الموضوع .. لا أعلم إن كنت ستغضب لو قلت لك كون متفائل ؟

في امان الله

جنّي يقول...

نهر الحب

مرحبا اختنا الكريمة ..

شكر لحضورك وتعليقك وكلماتك الجميلة ..

معك حق فأصحاب شخصية عواد في بلادنا العربية كثر .. على المستوى الشخصي وعلى مستوى الدول كما يحدث عندنا ..

جنّي يقول...

ماما امولة

مرحبا اختنا الفاضلة ..

اشكر حضور حضرتك وتعليقك القيم ..
نعم وكمان افسدوها بالمبيدات المسرطنة والبذور المعالجة وراثيا وغيرها الكثير والكثير ..

جزاكي الله خيرا

جنّي يقول...

سمكة واحدة

مرحبا يا سمكة شرفتيني ..

تعليقك جميل يا سمكة ..
البائع معروف واللي علينا تغيره وبالطرق السلمية علشان ما يلفقولناش قضية .. ودوام الحال من المحال ..

جنّي يقول...

محاسن صابر

مرحبا اخت محاسن ازي عبد الرحمن لعله بخير والحمد لله ..

خدعونا فقالوا خصخصة .. انما الحقيقة هي سرقة واضخم سرقة في تاريخ مصر الحديث ... وعلى رأي المثل ادي اللحمة فين القطة وادي القطة فين اللحمة .. مليارات ممليرة راحت فين ؟ ماعرفش !!
المهم ادي احنا عايشين وبايسين ادينا وش وضهر والحمد لله على النعمة ( بصلة وشوية جعضيض ولا شاكوريا )وربنا يحفظها من الزوال ..ويجعله عامر ..

جنّي يقول...

محمد جاليا

مرحبا اخي الكريم وشرفت مدونتي واهلا بيك دايما .. ( من فضلك صحح لي لقبك ان كنت كتبته غلط )

وحصلت اخي محمد باعوا البني ادمين على شكل اعضاء وربنا يسترها يا ابو حميد ..

شرفتني يا فندم

جنّي يقول...

حسن حنفي

اهلا يا ابو علي كيف حالك وعامل ايه ؟

احنا لو سكتنا على حقوقنا وحريتنا ها ياخدونا لمجهول مظلم .. لكن علينا دور في احداث التغيير واسترداد الارض والعرض ..

جنّي يقول...

نور الاسلام

اهلا وسهلا وشرفنا بزيارتكم ..

كلام الناس دول منتهى السلبية لابد من التفاعل مع ما يحدث والمساعدة في احداث التغيير ةومش ممكن اللي ها يجي يكون اسوأ من كدة ( هو فيه اسوأ من كدة ايه ؟ )

جنّي يقول...

محمد الجرايحي

وعليكم السلام ورحمة الله وبركاته

مرحبا استاذنا الكريم ..

واشكر حضورك وتعليقك ..

نعم نحن مشتركون في الجرم ولو بالصمت .. ولكن آن الأوان للخروج عن صمتنا حتى نحافظ على ارضنا ..

جنّي يقول...

عالم حبيب

مرحبا اخونا الكريم

والله كلنا بيدعي من قلبه ان ربنا يصلح الاحوال بس لازم يكون لنا دور ايجابي .. حتى لا نشارك بصمتنا في جريمة بيع مصر ..

جنّي يقول...

علي محمد

مرحبا اخ علي .. شرفتني والله .. فينك من زمان ؟ بشرنا عنك وايش اخبارك لعلك بخير والحمد لله .. وجزاك الله خيرا على سؤالك والحمد لله انا بخير بفضل الله وحوله ..

والله يا اخ علي انا متفائل دايما ولأقصى الحدود وعشمنا في ربنا كبير ..

كلنا مقاومة يقول...

السلام عليكم

واحنا بصمنا على العقد
اما برضانا ومعرفتنا واما بسكوتنا واما بالطناش واما باليأس واما بالحيلة والضحك علينا
ومن أعمالنا سلط علينا

واللي فاق منا مش شويه لكن معرفش ليه لسه ساكتين يمكن مستنين بس شرارة أو قائد يقودنا كالعادة

خلينا لما نشوف !!!

وبعد تصديق المحكمة على تصدير الغاز للصهاينة وطظ فينا كلنا يبقى ايه ؟؟؟

المهم
المسابقة نتيجتها طلعت

والله ما عارفة أقول ايه

هى فوضى يقول...

صدقت والله سلم لسانك
هواحنا بعنا ارضنا وبس شكلنا بعنا حاجات كتير ربنا يستر من بكره
احنا بعنا الاصل والاخلاق والطبية
وفقدنا اشياءاخرى
وبقينا خواجات وهنرفع البرنيطة
**
يارب تكون بخير

ahmed saker يقول...

السلام عليكم.....

الموضوع فعلا جميل و معبر....

جميل لان انت اللي كاتبه...

و معبر لانه فعلا بيعبر عن الحالة المغزية اللي احنا وصلنا اليها

اصبح كل شئ يباع في هذا البلد حتى الارض ثم سنأتي غدا ونبكي على ما تم بيعه

و لكن هيهات فقد يأتي اليوم الذي لن ينفع معه ندم

شكرا لك و لموضوعاتك الجميلة

سلوى يقول...

عواد باع أرضه
ياريتها أرضه
دي أرضنا كلنا

حسينا الله ونعم الوكيل

ساعات بقول حتى لو اشتراها إبليس نفسه
هتفضل أرضنا وهو اللي غريب فيها

آلاء محى يقول...

حسبنا الله ونعم الوكيل

fashkool يقول...

ازيك يا جنى
عايز تعرف احنا رايحين على فين
رايحين ع البلد اللى تجمع شمل العشاق
رايحين فى داهيه

shaimaa samir يقول...

http://wwwbloggercom-norahaty.blogspot.com/


ارجوا الدخول

Beram ElMasry يقول...

الاخ العزيز . جنّي
السلام عليكم ورحمة الله وبركاته
جعلت الارض لى مسجدا يعنى بيت الله ، وهو محرم على اليهود
هي البرسيم والقطن والفول والغلة ..... كان زمان قبل ان تسقط عليها الغربان فى زمن عواد ، وجعت قلبى ياجنى
لك تحياتى والسلام عليكم ، ولا سلام مع اليهود

م/ الحسيني لزومي يقول...

اقرأ نص اتفاقية منع تهريب السلاح لغزة
وادعوا الله ان يثبت مصر في عدم التوقيع عليها

fashkool يقول...

جنى العزيز .. تحياتى
اشكرك على الزياره وشرفتنى ونورتنى .. بالنسبه للمصدر طبعا مش اقدر اقول على مصدر كل معلومه .. لكن لو معلومه معينه عايزنى اقول لك عليه اقول لك عليها واقول لك كتاب ايه وصفحة كام كمان .. واحب اطمنك انى بابذب مجهود كبير لتوثيق المعلومه عشان لو حد سأل عن المصدر او المرجع اقول له عليه وعموما هذه المعلومات عصارة حوالى 5 كتب وعلى رأسهم كتاب مقارنة الاديان للدكتور عبد الله استاذ مقارنة الاديان بجامعة الازهر وكمان ابن كثير قصص الانبياء وكتاب البدايه والنهاية وكمان هـ . ج . ويلز فى بحثه عن تاريخ موجز للزمان واكتر من كتاب آخد منهم معلومه (مجرد معلومه)زى سليم حسن وول ديروانت . بالنسبه للموضوع دا بس
تحياتى يا جنى

فرنسا هانم يقول...

عواد زمان باع ارضه هو
لكن عواد دلوقتى باع حاجات مش تخصه هو لوحده
دا باع الشعب كله
عواد زمان اكثر احتراما من عواد دلوقتى

تحياتى لك يا جنى
على فكره
مدونه اجبرتنى على التوغل بها كثيرا
اسمح لى بالبقاء شويه ووصى على واحد شاى كشرى ونسكافيه واتنين ساندويتش

اه انا كنت هنسى
انا كنت جايه ابلغك ان البوست بتاع السلطانيه سينشر يوم الثلاثاء وميعاده يوم الاثنين الساعه العاشره مساء
لكن لقيت انك عارف وكاتب تحديث
وحلاوه البوست بتاع عواد ده خلانى اقعد هنا شويه
يلا بقى بلاش كسل فين واجب الضيافه؟؟؟

جنّي يقول...

كلنا مقاومة

وعليكم السلام ورحمة الله وبركاته

جزاكم الله خيرا على تشريفكم لنا ..

نعم نحن مشاركون في البيع بسكوتنا واسكانتنا ..

ولكني على يقين ان الشعب يوما سيبعث من سباته ويحاكم عواد النهاردة ..

اما المسابقة فالحمد لله وفخورون جدا بالمشاركة ..

جنّي يقول...

هي فوضى

اهلا يا نسمة المدونة نورت ..

شكرا على الزيارة والتعليق ..

ولسة الامل موجود ودي بلادنا ومش ممكن نسيبها لهم ولا يوم نرحل عنها .. بس نحاول وربنا معانا ..

جنّي يقول...

احمد صقر

وعليكم السلام ورحمة الله وبركاته

مرحبا اخ احمد ..

واشكر حضرتك لثنائك على الموضوع ..

ان شاء الله القادم احلى بدون من باعوا البلد ..

جنّي يقول...

سلوى

مرحبا اختنا سلوى كيف حالك يا فندم ..

اشكر حضورك وتشريفك ..

بالطبع حتى لو اشتراها ابليس سنستردها بس نحط ايدينا في ايد بعض ..

جنّي يقول...

الاء محيي

اهلا يا الاء سلامنا للوالد الكريم

شرفتي المدونة ..

جنّي يقول...

فشكول

يا اهلا وسهلا باستاذنا الكبير ( في المقام طبعا - مش قصدنا نكبرك في السن )

وهي فين البلد دي يا عم حمام ( مع الاعتذار للريحاني وليلى مراد اصحاب البلد اللي تجمع شملب العشاق ) قصدي ياعمنا ..

بس ان شاء الله اللي باعنا هو اللي ها يروح في داهية ..

شكرا يا افندم على حضورك وتشريفك ..

جنّي يقول...

شيماء سمير

مرحبا بالشيماء ..

تحت امرك يا افندم وتم التنفيذ ..

وجزاكي الله خيرا على ثقتك ..

جنّي يقول...

بيرم المصري

وعليكم السلام ورحمة الله وبركاته

سلامة قلبك يا عمنا .. واحنا ها نروح فين جنب كلامك اللي بيحرك القلوب ..

وعندك الحق فقد افسدوا الارض التي لم يبيعوها بعد كما افسدوا كل شئ في حياتنا ..

جنّي يقول...

م الحسيني اللزومي

مرحبا يا باشمهندس

اشكرك على دعوتك ..

جنّي يقول...

فشكول

تاني مرة

يا افندم تاعب نفسك ليه بس ..

اشكرك على اهتمامك .. اما المصدر فطبعا الموضوع كبير ومتكامل بل يقرب من البحث العلمي ان لم يكن كذلك وليس معلومة صغيرة تم ورودها ضمن نص ما .. فلذلك سألت عن المصدر بعدما استهواني قراءة المزيد عن الموضوع تاريخيا .. وعلى كل فقد ذكرت بعض المصادر وجزاكم الله خيرا ..

ومرة تانية شرفنا بزيارتكم والتعارف عليكم ونعتز باخوتكم ..

قلمي يقول...

تسلم ايدك ..للاسف الكل باع ..
--------

في البوس الي فات لما قلت لحضرتك ان الصوره متفبركه كنت اعلم انك جايبها من النت وان حضرتك اكيد ما فبركتهاش
وانا والجميع عارفين ان دحلان مش بيبوس الايادي بس ده بيبوس الجزم كمان

لكني احببت فقط ان اوضح انها متفبركه حتي لا يكون النقل ضعيف الاسناد
هههههههههههههه
موضوع مش مهم قوي اصله يعني مش حديث ومهم صحه اسناده
بس تقول ايه دماغي متركبه غلط اي شيء لازم اتاكد من صحه مصدره
------------------

اتمني انك تشرفني وتقرا ساتان وياريت تقولي رايك لاني احب اسمعه

جنّي يقول...

فرنسا هانم

بجد انا في منتهى السعادة بزيارتك وتشريفك اختنا الفاضلة .. ولو اعرف لبخرت المدونة بالعود والعنبر وفرشتها بالورود لاستقبال فرنسا هانم ..

وعلى الرحب والسعة وكل ما تطلبين نقدمه لكي بكل اريحية وسعادة ..

وشرف لي وللمدونة ان تنول اعجابك .. واجلسي براحتك وستجدين كل ما تطلبن واكثر ..
وعن التعليق اشكرك على حسك الوطني ..

جنّي يقول...

قلمي

مرحبا اخي الكريم

اشكرك على زيارتك وتعليقك ..

الكل باع .. بس انا والله ما بعتش ولا وافقت على البع ..

وعارف والله قصدك عن موضوع الصورة .. ولكني لست محترف لافرق بين الصورة العادية والمركبة فان كنت تعرف فدلني على الطريقة ..

ولو كنت اعرف انها مركبة ما نشرتها ..

وان شاء الله ازورك ..

غير معرف يقول...

يارب تستفاد من مدونتى دى هاتفيدك جدا

http://noureldens.maktoobblog.com

الفاتح الجعفري يقول...

سلام الله عليكم ورحمته وبركاته
استاذي ربنا يحفظك ويبارك فيك
للاسف باع ارضه وعرضه وامته وشعبه ودينه للاسف باع كل شيء ,ولكن باع بلا ثمن , ولكن العيب ليس علي منا باع واشتري العيب علي من وقف يتفرج وهو يري كل ذلك يباع , اري العجب علي من راي املاكه تباع امام عينه وهو واقف متفرج !!
نسأل الله ان يبصر امة الاسلام وينصر الاسلام نصرا عزيزا
حفظكم الله وجزاكم كل خير

david santos يقول...

Great posting, my friend, great!!!
Congratulations!!!!

كلنا مقاومة يقول...

السلام عليكم


ألف مبروك الجائزةالرمزية وشكرا جزيلا على تواصلك الدائم معنا وتشريفنا بمشاركتك في المسابقة فنحن الفائزون بكم

جنّي يقول...

غير معرف

اهلا بيك ان شاء الله نزورك

جنّي يقول...

الفاتح الجعفري

وعليكم السلام ورحمة الله وبركاته

مرحبا اخي الكريم ..

اشكر حضرتك على التواجد والتعليق الواعي ..

وجزاكم الله خيرا

جنّي يقول...

david santos

You are welcome

Thank you

جنّي يقول...

كلنا مقاومة

جزاكم الله خيرا وربنا يبارك فيكم واشكر جهدكم في المدونة وفي انتظار مسابقاتكم الهادفة ..

كيــــــــــــارا يقول...

الله المستعان

تفاءل يااخي ربنا كبيييييييييير

نبض الحياة يقول...

يااااااه فى الجزء الاول رجعنا لزمان وايام زمان وبعد كدة صحينا على الواقع واحنا مش عارفين رايحين فين
ربنا يسلم
جزاك الله خيرا .

جنّي يقول...

كيارا

اهلا يا كيارا

شكرا لمرورك وتعليقك

والله انا بطبعي متفائل وان شاء الله الخير قادم

جنّي يقول...

نبض الحياة

شكر الله لكم الزيارة والتعليق

بس دورنا لازم نعرف بالفعل احنا رايحين على فين حتى ننستطيع ان نغير من المسار الخاطئ الذي سار به بنا حزب فاسد ..

اللؤلؤة يقول...

السلام عليكم
العزيزة جنى: شرفت بزيارتك وتعليقك الذى أضاف لى معلومة جديدة بأن محمد الفاتح قد اشترى كنيسة أيا صوفيا وحولها إلى جامع وكانت كل معلوماتى بأنه عندمادخل القسطنطينية صلى فى الكنيسة وحولها إلى جامع.
وأشكرك على التواصل
تحياتى

mostafa يقول...

السلام عليكم و رحمة الله و بركاته

بصراحة مش عارف اقول إيه ممممممم بس من الاخر إحنا ممكن ناخذ خطوه
إحنا ممكن نرجع للدين الصح
دين الصحابة و التابعين
و انا قصدى كل حاجة فى المعاملات الماليه و الدنيويه و الحياتيه كمان
انا بجد نفسى الناس تفكر فى الهجرة
بس الهجره الداخلية انا نفسى اخذ ارض (فى اى مكان فى البلد) و ننشا اول بذرة لمجتمع دينى صح احنا اة فى اخر الزمان و دة انا مؤمن به جدا جدا بس و
غيه يعنى ما يمكن يكون لسه فاضل فى الدنيا شويه و نلحق نعمل حاجة خير انا بقالى كتير اووووى بتكلم مع كل الناس إللى انا اعرفها اصحاب و صحاب و زمايل شغل و كل إللى اقد علية بس للاسف كله عارف إن كل حاجة حواليه غلط و مستنى الناس هية إللى تاخذ اول خطوة
يا رب لو كل الناس باعونى تقدرنى و تكتبلى هجرة ليك يا رب
و يا ريت لو حد شايف ان الفكره مقبوله عندة او يعرف حد نفسة يعمل كدة يكلمنى و مش هاختم غير ب حديث رسول الله صلى الله علية و سلم (إذا قامت القيامة و بيد احدكم فسيلة فليغرسها)
اة معلش محدش يقولى اصل التكاليف و الفلوس و و و و انا قولت فى الاول هجرة إلى الله و نعمر ارض بتقوى الله
و السلام عليكم و رحمه اللة و بركاته

mostafa يقول...

السلام عليكم و رحمة الله و بركاته

بصراحة مش عارف اقول إيه ممممممم بس من الاخر إحنا ممكن ناخذ خطوه
إحنا ممكن نرجع للدين الصح
دين الصحابة و التابعين
و انا قصدى كل حاجة فى المعاملات الماليه و الدنيويه و الحياتيه كمان
انا بجد نفسى الناس تفكر فى الهجرة
بس الهجره الداخلية انا نفسى اخذ ارض (فى اى مكان فى البلد) و ننشا اول بذرة لمجتمع دينى صح احنا اة فى اخر الزمان و دة انا مؤمن به جدا جدا بس و
غيه يعنى ما يمكن يكون لسه فاضل فى الدنيا شويه و نلحق نعمل حاجة خير انا بقالى كتير اووووى بتكلم مع كل الناس إللى انا اعرفها اصحاب و صحاب و زمايل شغل و كل إللى اقد علية بس للاسف كله عارف إن كل حاجة حواليه غلط و مستنى الناس هية إللى تاخذ اول خطوة
يا رب لو كل الناس باعونى تقدرنى و تكتبلى هجرة ليك يا رب
و يا ريت لو حد عايز يعرف تصورى يراسلنى على الهوتميل eng_mmw و مش هاختم غير ب حديث رسول الله صلى الله علية و سلم (إذا قامت القيامة و بيد احدكم فسيلة فليغرسها)
اة معلش محدش يقولى اصل التكاليف و الفلوس و و و و انا قولت فى الاول هجرة إلى الله و نعمر ارض بتقوى الله
و السلام عليكم و رحمه اللة و بركاته