الأحد، أبريل 13، 2008

حمير ... حمير ... مش أحسن ما نموت من الجوع ...

شوفت ياسيدى أحدث نكته قالها رئيس خدمة بيطرية .. لحم الجحش دايما صحي .. لأ وكمان حلوة ومش ضارة .. وإن الشعب المصري خصوصا من مصلحته أكل جحوش .. يالا بسرعة شوف كام كيلو قبل مايغلى وما تلاقيهوش .. يالا شفلك جحش صغير لحمه بتلو يا دوبك غلوة .. مش ها تبرطع ولا ها تنهق أي والله كلام معقول ..
حيث الجحش المصري عموما يجعل من بني ادم غول ..
تاكل فخده من غير ديل والدكتور بيطري مسئول ..
يديك طاقة وقوة عجيبة تسمن جدا تبقى مهول ..
ثم أضاف الدكتور بيطري لحم العجل سم أكيد ..
بيزود أوجاع المعدة ويعود على طولة الايد ..
واللي بياكلوا لحم العجل حيخشوا جهنم تأبيد ..
يا دكتور بيطري يا مزقلط يا مصدر يا غير مسئول ..
حيث ان انتو عقول العالم والعالم محتاج لعقول ..
ما رأى جنابك وجنابهم فيه واحد مجنون بيقول ..
سيبونا نموت من لحم العجل وانتو تعيشوا وتاكلوا جحوش ..
ما رأيك يا كابتن بيطري مش بالذمة كلام معقول ..
( على وزن قصيدة الفول واللحمة مع بعض الأبيات لعم أحمد فؤاد نجم )

هناك 14 تعليقًا:

موناليزا يقول...

للدرجة دى بقى ده أخرنا

shaimaa samir يقول...

احم
ربنا يسترها
وضع ماساوى
انا لمارد على حضرتك من قبل
لاننى اردت ذلك
وكان لا يقبل
شكرا لك

جنّي يقول...

أمة الله
أم قطرة مطر ؟
أم الموناليزا ؟
السلام عليكم
تشرفت المدونة بمرورك ..
الخبر فعلا صحيح .. رئيس هيئة الخدمة البيطرية في وزارة الزراعة صرح بأن لحم الحمير صحي ومفيد ..
تحياتي

جنّي يقول...

الأخت شيماء
أهلا بيكي ..
شكر الله لكي مرورك السريع .. لا اقصد أي شئ .. أنا فعلا علقت على بوست الصدفة المتعمدة .. وحضرتك رديتي بس بياء المخاطبة وتاء التأنيث .. والله مش زعلان .. ولكن للتوضيح فقط ..
تحياتي

الباحث عن الحقيقة يقول...

ههههههه
مانت دمك خفيف اهو
لا وناصح
عجبتني موضوع خلي الجحوش للدكتور بيطرى
وادينا احنا العجول
بس تفتكر هيدينا العجول ولا هياخد كمان الجحوش
ولا هنشوف بتلو عجالي ولا جحشاوي
ومات يا حمار لما يجيلك العليق
مش بعيد امام الغلاء ده يطلع طنطاويكو يبيح اكل الجحوش زى موضوع الجراد كده
بالمناسبة شوفلك حل يا عم انت في موضوع الكود ده
كل ما اكتبه يطلع غلط
خد للذكرى zdckrobf اخر كود طلع معايا

مصر اللى مشفتهاش يقول...

كده كتير..:(

خلاص قررت أبقى نباتية 100% :((

جنّي يقول...

الأخ الباحث
أخيرا شرفت .. على الرحب والسعة..
وبعدين أنا واخد خفة الدم من حضرتك .. بس بقالك بوستين ( قصدي موضوعين )!!! من غير خفة ..
طنطاويكو أنتو .. أنا راجل بتاع بيولوجي ..
عن الكود ياعم اتعلم انجليزي بقي ( القط كات والفأر رات والنهر يدعى عندهم ريفرو ) مش كده ولا أيه

جنّي يقول...

الأخت عائشة
نورت البلوج
والله نحن نباتييين من زمن بعيد على الفول والطعمية وشوية جرجير .. (وحتة جبنة قديمة تبقى الأكلة عظيمة .. وحبة فول حراتي تبقى الأكلة زواتي ) ماجتش على اللحمة ..
تحياتي

سلوى يقول...

هي حصلت حمير كمان

بس كويس طالما شايفين إنها مفيده
يبقى خليها لهم زي ما انت قلت

يعني أشمعنى دي اللي يسيبوهالنا

بس حلوة بجد

جنّي يقول...

اخت سلوى
السلام عليكم
خطوة عزيزة ومرور غالي ..
شكرا على التعليق الرقيق ..
بس أنا سمعت ( بس من بعيد )ان الدكتور البيطري اللي قال ان الحمير لحمها حلو وصحي ظهرت عليه أعراض استطالة غير طبيعية في الأذنين ..وبروز أسفل الظهر .. ربنا يسترها على الجماعة بتوع الدليفري ..
لك كل الشكر سلوى .. وحالا أمر على مدونتك ..
تحياتي

مشروع انسان يقول...

لازم نعر نتكيف مع الظروف برضه
محدش يكره

يعنى مش فى الصاعقة بياكلوا تعابين
الناس دى عايزلنا الخير
وبيربونا
عشان نعرف نكون زاهدين فى الدنيا

ربنا يخليهم يا رب
:)

جنّي يقول...

الأخ العزيز إمام الجيل
السلام عليكم
حللت أهلا ونزلت سهلا .. المدونة نورت ..
ونعم التربية .. بس ازاي يربونا وفاقد الشئ لايعطيه .. فاهم قصدي ..
وربنا يخليهم يبرطعوا براحتهم ويربونا !!!
شكرا على حضورك ولا تحرمنا من زيارتك
said

Esraa Hamed يقول...

ههههههههه
هم يضحك و هم يبكي فعلا

حسبي الله و نعم الوكيل

جنّي يقول...

الأخت إسراء حامد
السلام عليكم
ألم يقولوا شر البلية ما يضحك
شكر الله لكي
تحياتي