الخميس، أبريل 04، 2013

شيش بيش 2 ..


   وقف ياريس حنتيرة فيه ناس هنا قاعدة كتيرة ولا حد قال هات تعميرة ولا واحد شاي ... اللي ها يقعد راح يطلب واللي ما يطلبش يبعد ... قلت للمعلم عيسى موسى ايه الحكاية ؟ قالي واحد وعامل شحط سياسي والتاني قال ايه شحط حقوقي .. عايشين عوالة ومستنين سبوبة .. ماهو ولاد الحرام اللي سرقونا راجعين تاني يحاربونا بفلوسنا وبيتأسفو للمخلوع وفلوله .. ماهو يا بيه الضرس المسوس مش ممكن يتركب تاني بعد ما اتخلع ومات العصب وسقط الحشو .. وفي الزمان والمكان يملى الشحط الأناني كوكتيل وفتيلة بالكره يولعها ويحرق ويقفل ميادين ويسرق فنادق ويتحرش ويحشش ويشد بودرة ويضرب ابرة ما يضرش ويقتل برضه ما يضرش ما هم خرفان وخرفان ضاحي ملاينو جاهزة وكله بتمنه زي ما تكون مصر مرات ابوه ... وحلف الخراب اللي سموه - وياريتهم سموه قبل ما يسموه الجبهة -  يا ترى ها يرجعونا مشي لخمسة يونيه ويعملوا له جمعة زي ما رجعوا عيالنا زمان مشي من الجبهة وقالوا لعين الشمس ما تحماشي أحسن الجيش راجع ماشي .. وزي ما كذبوا ووقعوا طيارات وحرروا تل أبيب واسألوا احمد سعيد .. بقى الكذب وقلة الحيا والتجرمة عند اعلامهم أكل عيش ومصلحة ومتوارث ما هو التوريث مش صناعة سوزانية بس .. دي صناعة مسيلمة وسجاح .. قلتله يا معلم عيسى موسى دا أكل عيش وحلاوة وقاضيهم بقى زي حلاوة وحرية وكرامة ضايعة من خمسة يونيه في الحربي والمحاريق ... قالي يا بيه مش كل واحد قال بقين حمضين يبقى واحد مننا ... ولا كل واحد حب يلبسنا بردعة يقدر يركبنا خسروان ويقفل منشآتنا النووية كمان ويقتل الضبعة وهو كلب جربان .. ولا كل واحد خسيس من غير شنب شرب سيجار يبقى راجل دولة والرجال قليل .. يا بيه دول حقدوا وحسدوا وظلموا وقتلوا زي ما يكون عرقهم مادد لجدهم قابيل .. يا بيه دول كسروا الصليب وطلعوا الأبراج وحاصروا وهاجموا الأسوار ولما فشلوا على ايد عيسى الغواص والدمشقي ركبوا الفيل وحاصروا البيت ورجع الفيل واستدار فجربوا الخنازير فدنست الميدان وياريت ولادنا يرجعوا له بس يغسلوه سبع مرات.. والتعلب فات فات وفي ديله زند ولواءات وكل خططهم ها تبوظ ومش هايلاقوا تهاني .. ومصر يابيه عمرها ما هتبقى دكان شحاته ولا عفاشة ولا قذارة لحين ميسرة .. مصر اللي سرقوها ستين سنة ها تبقى حلوة ونضيفة وبهية بالخمار والحجاب والاخلاق الندية  .. قلت للمعلم عيسى موسى بالتمني ؟ قالي لأ بالعدل زي ما قال ربنا سبحانه وتعالى (إِنَّ اللَّهَ يَأْمُرُكُمْ أَنْ تُؤَدُّوا الْأَمَانَاتِ إِلَى أَهْلِهَا وَإِذَا حَكَمْتُمْ بَيْنَ النَّاسِ أَنْ تَحْكُمُوا بِالْعَدْلِ إِنَّ اللَّهَ نِعِمَّا يَعِظُكُمْ بِهِ إِنَّ اللَّهَ كَانَ سَمِيعًا بَصِيرًا ) (58) سورة النساء
والعدل يا بيه أساس الملك وزي ما قال أمير الشعراء :
بِالعِلْمِ وَالمَالِ يَبْنِي النَّاسُ مُلْكَهُمُ .... لمْ يُبْنَ مُلْكٌ عَلَى جَهْلٍ وَإِقْلاَلِ
   حييت المعلم عيسى موسى وهممت بالانصراف قالي : ماتيجي نلعب عشرة طاولة بس ما تقرص الزهر زي عوايدك  ... قلتله يا معلم اللعب دلوقتي ما بقاش همي .. انا همي مصر اللي ها نبنيها مش نخربها ونهدمها ونولعها ..
دا لينك شيش بيش 1 في مارس 2010 قبل الثورة ...
  
 رسالة لبعض أصدقائي القدامى : يا من سببتونا ولعنتونا ونعتونا بالخراف في غمار حملة بث روح الحقد والكراهية .. أقول لكم الحمد لله الذي جعلنا كالحملان الوديعة في السلوك وليس في الخلقة ولم يجعلنا كالخنازير القذرة ..

 ودي قصة الأنذال من فيلم أمير الإنتقام 
استمتع بسماعها 

هناك 6 تعليقات:

shaimaa samir يقول...

مرحبا ايها الجنى
عودا حميدا
ةالعودة بهم كبير
وحب كبير
" مصر"

حفظها الله

والتاريخ هو الحكم

وما علينا هو تدوينه بانصاف واحكام
وليس بتشويه وعدم وعى

جنّي يقول...

shaimaa samir

مرحبا اخت شيماء

اشكرك على الزيارة والتعليق ..

الجزء الاخير من التعليق : اشكرك على نصيحتك وسأعمل بها ..

اما ان كنت تقصدي ما كتبته فأنا اراه من وحهة نظري حقائق لا يجهلها احد ووعاها الكل واستاءوا من افعالهم الا هم وهم من شوهوا انفسهم بأفعالهم .. اما حكم التاريخ فالمقدمات تدل بوضوح على النتائج ويومها سيعلم الذين ظلموا اي منقلب ينقلبون ..

لكي كل التحية

سمكه واحده يقول...

انا مش فاهمه حاجه
بس حبيت امسي
جيت اسلم
لن بقالي كتير مش هنا ولا هناك
(:

سمكه واحده يقول...

كل اللي فاكراه تك تك يا ام سليمان
ال هو انت اخوان ولا ايه؟؟؟؟
ههههههههههه ياله خير

جنّي يقول...

سمكة واحدة

زيك يا سمكمك .. لعلك بخير .. انت فعلا مش هنا من زمان ودا للاسف حال الكثير من المدونين الذين جرفهم تيار الفيس بوك فأهملوا مدوناتهم ..
زيارتك رجعتني لزمن التدوين الجميل .. ويا ريت نرجع كلنا من تاني .. لسة فاكرة تك تك يا ام سليمان .. شغلتنا السياسة وقتلت فينا الحب والرومانسية .. وعلشان خاطرك وزيارتك ها انزل بوست جديد النهاردة رومانسي خالص يا ريت تشرفيني وتقرأيه ..
على فكرة قبل ما امشي ...

ال هو انت مش اخوان ولا ايه؟؟؟؟
ههههههههههه ياله خير ..

ها ها ها ...
المهم مهما كانت انتماءتنا ان يكون الاحترام وتقبل الرأي الآخر بلا سباب ولا لعنات هو السائد بيننا ..
ولكن للاسف تناحر من كانت اكتافهم في اكتاف بعض في التحرير وتبادلوا الاتهامات بل والسباب والتقاتل وانتهج البعض الحرق والقتل والتخريب .. ومع ذلك كلي امل في غد مشرق ان شاء الله ..
لكي كل الود والتحية

faroukfahmy يقول...

لايزيد التناحر والتنافر الا الفرقة والابتعاد
شدنى كلامك البلدى الذى نسمعه ينادينا من الاحياء الشعبية الاصيلة لعلمك انا من حى باب الشعرية ودفعنى اسلوبك الى طلب الانضمام الى متابعينك الافاضل وارجو ان تفعل المثل لتواصل اعمالنا
مع شكرى وودى
الفاروق