السبت، مايو 15، 2010

السلطانية ....

افتح الملف الصوتي لسماع الصورة الغنائية القديمة " قسم " السلطانية -
كان يكره الحمقى والمغفلين .. وكان يدعو الله دائما ويقول : يا رب أتجوز واحدة طيبة وبنت حلال ما تكونش زى هناء الهبلة بنت أم وطنية جارتنا ..
وذات يوم أيقظته أمه من نومه .. قوم يا وله لقيتلك العروسة .. بجد والنبي يا امه .. هي مين ؟ بت زي القمر وهادية وساكته وعايزة تعيش وكفاءة .. عز الطلب يا امه أنا عايزها هادية وساكتة انأ ما بحبش اللت والعجن .. وشافها وأعجبته واتفقوا على المهر والشبكة والذي منه .. وتم الزواج .. ولكن لم يكن هدوء وسكوت ستوتة ( دا اسمها ) إلا نذير لشيء كان يخشاه صاحبنا ولا يتمناه .. ولكن اللي يخاف من العفريت يطلع له .. وبدأت تظهر ملامح العته على ستوتة وفي يوم قالت لصاحبنا : لو جت عاشورا مع رمضان نصوم يوم عاشورا بعد العيد ؟ قالها : يا ستوتة رمضان ما يجيش ابدا مع عاشورا !!! قالتله : أنا مش ستوتة .. أنا غيرت اسمي .. أنا اسمي رشا واللي يقولي يا ستوتة مش ها أعبره .. قالها: ليه بس دا ستوتة اسم كله دلع !! وفي يوم عاد من عمله وطرق الباب .. افتحي يا ستوتة .. قالت من خلف الباب : هو الراجل أتجنن ولا إيه .. خلي ستوتة تعبرك بقى .. يا ستوتة افتحي .. والنبي لما تدن ..
وخرج صاحبنا هاربا لينفد بجلده من االمغفلة .. وسافر لبلاد الله وخلق الله واستقر في قرية من القرى .. وقرر الزواج وأعجب بإحدى البنات وخطبها ويوم الخطوبة وفجأة تحولت ابتسامة البنت إلى ذهول وسرحان وقالت : يعني ها أتجوز واخلف والواد مقصوف الرقبة يكبر ويخرج يلعب في الشارع ويطلع النخلة اللي قدام البيت ويقع ويموت .. يا لهو بالي .. يا خرابي .. ياروح قلب امك يا حبيبي وتلطم ويشتد لطمها .. وتسايرها امها تلطم وتشلشل وتندب قائلة : يا خرابي يا خويا .. يا حبيب ستك يا ضنايا .. ما كانش يومك يا كبدي .. واذا بأبوها يقول مش قلتلك خلي بالك من الواد وما تسيبيهوش يلعب في الشارع .. وهنا أدرك صاحبنا انه وقع في بيت من المغفلين فغافلهم وفر بجلده ..
وبلاد تشيله وبلاد تهبده .. وقادته قدماه لقرية أخرى .. وإذا بمجموعة من البنات يغسلن أقدامهن في ماء الترعة ويصرخن ويقولن ياعم الحقنا والنبي .. فيه ايه يا بت انتي وهي ؟ رجولنا اتلخفنت مع بعض في الميه وكل واحدة مش عارفة رجليها .. شوفلنا حل والنبي ياعم .. فأمسك بعصا وأخذ يضربهن .. فخرجن مسرعات من المياه يشكرنه .. فندب حظه يارب انا بتكعبل في البنات الهبلة ليه بس .. أهرب من واحدة هابلة أقع في بلد كل بناتها هبل .. انا ماليش عيش في البلد دي كمان ..
والمرة دي اتهبد في بلد ترفع الزينات والزغاريد تجلجل والنقرزان يضرب .. قال بشرة خير .. وسأل أول من قابله فقال له : ابن العمدة ها يتجوز النهاردة .. ولكن العمدة لم يكن مسرورا وتؤرقه مشكلة ما .. وتعرف إلى العمدة وقال له : إيه المشكلة يا عمدة يمكن اقدر أحلها .. قال العمدة : سلو بلدنا يا بني إن الولاد ما بيلبسوش سراويل داخلية أبدا إلا يوم جوازهم .. قال : وإيه المشكلة ما يلبس سروال .. قال العمدة : ما بيعرفش .. قال : أي حد تاني يلبسهوله .. قال العمدة : ما حدش بيعرف في البلد الا طريقة واحدة .. انه الواد يطلع على السطح وينط في السروال اللي ماسكه اربع رجالة واقفين تحت .. وانا خايف يقع تتكسر رقبته زي اللي قبله واللي مات منهم كتير .. قال : ولا يهمك يا عمدة انا ها البسهوله من غير ما يجراله حاجة .. قال العمدة : بجد والله لو عملتها ليك عندي مكافأة كبيرة قوي .. قال : هاتوا السروال ولعريس .. تعال يا ابني دخل رجلك اليمين .. يلا ورجلك الشمال .. وارفع السروال لفوق .. وارتدى العريس السروال .. وهاجت القرية وماجت .. زغاريد وصفافير وتصفيق شديد .. فقد اكتشفوا طريقة حديثة للبس السراويل .. وهنا قال العمدة لصاحبنا : دلوقتي اقدر اخلع عليك .. وهنا تذكر صاحبنا مرزوق العتقي والسلطانية .. فشهق وقال : ايه ايه ؟ قال العمدة اخلع عليك عبايتي وأجوزك بنتي .. فصاح : السلطانية ..
كنت قد نشرت هذا البوست من قبل في مدونة الضاحكون ..

هناك 24 تعليقًا:

كلمات من نور يقول...

يستاهل خرم عينيه حد ثاله يهرب من ستوته ؟ أهو وقع في الهبل بجد ...........هههههههههه فين ايام مسلسل السلطانيه ...تاج تاج عظيم ...أضحك الله سنك يا جني ...ربي يكرمك ويصلح حالك ويرزقك حبه وحب من يحبه وحب عمل يقربك إلى حبه...تحياتي

أكون أو لا أكون يقول...

ههههههههههههههههههه جرب غيري تعرف خيري مش كده؟

ستيتة يقول...

السلام عليكم

تحفة تحفة تحفة
مناسبة جدا
اولا لأسمي السري
واللي يجي على ستوتة ميكسبش
ثانيا للضحك
وهي فعلا تفطس من الضحك وانا استدعيت معاها فعلا السلطانية
ثالثا هو انت بتسقطها لا سمح الله على حاجة كيده ولا كيده؟ هه

تحياتي

Tarkieb يقول...

اللي وقع على ستوتة مرة مش ح يعرف يخرج بالمرة..ده صاحبك مغناطيس .ادي ضريبة اللي بيحشر نفسه ويلبس الناس بناطيل ههههههههه

مجداوية يقول...

السلام عليكم

إممممممممممممم

حضرتك يعني بتوريني عينة من الحكايات اللي تغسل القلب الحزين ؟

هي فعلا ظريفة جدا
بس مش واقعية

عشان تعذرني
الواقع الضحك فيه كالبكاء لكن الخيال قول براحتك

أضحك الله سنك
:)

حنحاول ندور على حاجة تفرح
يارب ألاقي
يارب ألاقي

:)

ستيتة يقول...

لك عندي واجب على هيئة رجاء
فهل من مجيب؟
ولو كان الواجب ده ضد اهدافك الشخصية من فتح مدونة فأنا اعذرك واتفهمك ومفيش مشكلة ان شاء الله

أحمد الخير يقول...

أضحك الله سنك أخي

(ست* جنى* الحسن) يقول...

السلام عليكم..
افتكاسة حلوة بس انا معرفش قصة السلطانية

saragebaly يقول...

هههههههههههه

آدي آخرة الي يفكر يهرب من ستوتة


جمييلة جدا


تحياااتي لك
سارة

كلمات من نور يقول...

عندكم تاج مهم يا جماعة الخير
ادخلوا هنا :

http://mamanooor.blogspot.com/2010/05/blog-post_15.html

غير معرف يقول...

القصه جامده بس على مااعتقد كده يعنى ده اسقاط على شىء ما صح
بس بجد تموت من الضحك
تحياتى

فاروق سحير ( فاروق بن النيل ) يقول...

الأستاذ سعيد ...أهلا بيك ..
قصة فكاهية ولكن ةليست من الواقع مبالغ فيها كمان موش فاهم دخل السلطانية إيه فى الموضوع ربما لأنى موش عارف قصة السلطانية إلا إذا كنت تقصد من كان له أخ سافر بالبحر وعاد بعد مدة ومعه ذهب وياقوت ومرجان وتاج ملوكى وذهب أخيه بعد ماسأله عن هذا الملك والجزيرة فدله عليها ووصف الطريق
وعندما عاد وجده يبكى ويقول لأخيه لقد
أعطانى الملك هذه السلطانية من الفخار وقال له هذه أفضل هديه كانت تاجا على رأسى أعطاها لى رجل صالح فقال له أخيه تستحق هذه السلطانية أنا الذى أعطيتها للملك فكافأنى بهذه الجواهر والتاج الذهب وقد أخذتها أنت لأنك طماع طمعت فى مالى فأعطاك الملك والله حظك من الفخار .
على فكره ياسعيد بحثت فى مدوناتى الثلاثة عن العضو" My Blog" الإباحى الذى قولت عليه لأمسحه ولم أجده يمكن " جوجل" هى التى تضعه وتخفيه كما تشاء لأنى وجدته عند كثيرين من الأصدقاء رغما عنهم وشكرا لك بس قولى وجدتها عندى فين

ahmed_k يقول...

هههههههههههه
مش كانت ستوته قصدي رشا أرحم
قصه جميله يا سعيد
تسلم إيدك

shaimaa samir يقول...

تحفة
وهمية
فظيعة
رهيبة
ههههههههههههههههه
هههههههههههه
لبكرة

جديدية يا ا سعيد

تحيتى

جلال كمال الجربانى يقول...

السلام عليكم

حد قاله يهرب من ستوته
أهو وقع فى إللى أستت منها

ودمت بخير حال

rovy يقول...

هههههههههههه
حرام عليك يا جنى ده أنت كده طلعت كل البنات هبله .. معقول يا راجل و لا واحده يقابلها عاقله :)
عموما أهو أخذ جزائه .. :)
سلمت يديك ..
تحياتى الدائمه

SHAPE YOUR LIFE (ABOALI) يقول...

جنى العفريت المتعفرت

ده اسقاط بقى يا عم جنى واضح

اممممممممممممم
شكلك كده بتحرجم على حاجة وناوى
على العموم
لبست العمة وانا باقرء علشان السلطانية هاجيب فيها بليله
اووووووومال انا بحب البليلة
انت عارف بقى الحر والصيف والبليله ليها دور

تقديرى لما كتبت يا انسان واسقاط عال العال يا معنمى

ابن الإخوان والأزهر يقول...

علشان يحرم يتجوز تاني

حد قاله يتجوز

دا حتى ممكن بتجوز و يوم الدخلة البيت ينهار قبل ما يدخلوا

ويقعد يا كبدي هو ومراته في الشارع

يا خراب بيتك يا صاحبي

حسن ارابيسك يقول...

جني صديقي العزيز
الحقيقة لااخفي أنني ضحكت بالفعل على اللي بخته مايل ده من يوم امه ما ولدته
وبالنسبة للأوبريت الغنائي القديم بتاع السلطانية هو من الاوبريتات الجميلة القديمة وزي كمان اوبريت عوف الأصيل وزي اوبريت على بابا ..الخ
فكرتنا بالزمن الجميل
تحياتي
حسن أرابيسك

♥♥ شذا ♥ الروح ♥♥ يقول...

هههههههههه

جميله اووى يا فندم

ربنا يسعدك على طول يارب ويريح قلبك
وبجد حضرتك وحشتنى كتير

يارب تكون بخير

shimaa elkholy يقول...

ايه ما فهمتش حكاية السلطانيه دي ليه

حد يفهمنى طيب

وبعدين تعالى هنا يا استاذنا مدونتك دوختنى على ما عرفت ادخل التعليقات مش عارفه ليه

وبعدين نشرته عندنا فى الضاحكون وانا مش فاكراه ازاي

انا مخي ساح على فكره وبقيت انسى حاجات غريبه

بس بجد بوست حلو اوي
تسلم اديك

مصطفى يقول...

ياحبيبي ياخويا...ياروح قلب أمك ياضنايا ..

هههه :)

قلم ساخر بجد..بالتوفيق..والمدونة أعجبتني جدًا من أول زيارة .. :)


تحياتي.

admin يقول...

تم افتتاح منتدى
ibond.builder-eg.com
ويقوم أعضائه بكتابة موضوعات مجلة المجتمع المدنى العربى
csmag.builder-eg.com
و دليل المصادر المفتوحة
foss.builder-eg.com
بالاضافة لمواقع أخرى سيتم افتتاحها بعد نجاح و ثبات المواقع السالفة ,
مزايا الاشتراك فى الموقع:
* الحصول على عروض مختلفة!
مثال:
الاعلان عن موقع أو مدونة العضو
الحصول على تخفيضات فى أى موقع تابع لنا, حاليا موقعنا يختص بالاستضافات و بيع البرامج, لكن قريبا سيتم تأسيس موقع للتجارة الاليكترونية ان شاء الله

* الاشتراك فى مجموعات التى سيتم انشائها ل :

* تأسيس مكتبة لكتب الأعضاء, و ذلك بعد عمل عدد لا بأس به من الكتب( بشروط أهمها أن يكون الهمل جماعى أو فردى لكن حاز اعجاب أغلبية الأعضاء)
* مجموعات دعم المصادر المفتوحة , مثل الترجمة و الشرح , بالاضافة لدعم أى مشروع عربى مفتوح المصدر
*مقدمى خدمة توصيل أقراص برامج مفتوحة المصدر ,
* تحرير مجلة المجتمع المدنى
* كتابة مقالات دليل البرامج مفتوحة المصدر
* كتابة مرجع للأمن الاليكترونى
* العمل على زيادة تحديث و تطوير المجتمعات المالية العربية لكى تصبح مجتمعات لا نقدية ,( استخدام بطاقات الائتمان و الحسابات الاليكترونية الخ)
* و اجمالا تبادل الخبرات بين أعضاء الموقع
وغير ذلك كثير بإذن الله
شكرا

متهوره بٌلطف يقول...

مثل سعودي
ماتعرف قديري لما تجرب غيري
بمعنى ماتعرف قدر ومكانة اللي خسرته الا لما يمر عليك ناس هبله زي صاحبنا

خخخخخخ


10/10 ياجني