الأربعاء، مايو 28، 2008

علمني الكتاكيت ....

تخرجت وحصلت على الشهادة الكبيرة .. وأيضا تم تعيني .. يا فرحة أمك بيك .. وكم راتبك الشهري ؟ .. مش مهم .. المهم إنني أعمل في عمل اخترته بإرادتي ولم يفرضه علي مكتب التنسيق أو غيره .. عمل من أعمال الأنبياء .. أهناك أفضل من تربية وتعليم أبناء بلدي لنرقى ببلادنا إلى مصاف الأمم الراقية .. كلام جميل إذن كيف ستعيش وتتزوج وتنجب ؟ ربنا كريم .. ستعطي دروس خصوصية ! لا والله أبدا لن يكون .. راتبك لا يكفي لاستئجار نصف شقة .. قلت لك ربنا كريم .. ثمان سنوات ولم تفعل شئ .. هل لا زلت مصر على عدم إعطاء الدروس الخصوصية ؟ .. أقسمت ألا يكون .. الوقت يمر والعمر يمر .. فمتى يكون لك شقة وزوجة وأبناء .. عندما تشيب ؟ - دا ابن الشيبة يتيم - قلت لك ربنا كريم .. ثمان سنوات وحفيت على مكاتب التوظيف بالخارج .. وجاء الفرج عقد عمل بدولة عربية .. مدرس ؟ لأ .. مندوب مبيعات براتب معقول .. والسفر قريب إن شاء الله .. والتربية والتعليم والأمة الراقية ؟ سيكون سفري لفترة محدودة وانتقالية .. وممكن أجد عقد عمل مدرس .. وبلدك ! كل بلاد العرب أوطاني .. دي قومية عربية ؟ ولما لا تقول إسلامية .. فمتى يأتي زمن تكون فيه كل الدول العربية والإسلامية أمة واحدة على قلب رجل واحد أو على الأقل على فكر واحد مرجعيته إسلامية .. تختفي فيما بينها الحدود وتكون هويتي ( جنسيتي ) هي إسلامي .. وأحمل جواز سفر إسلامي .. حلم بعيد المنال .. تراه بعيدا وأراه قريبا .. ومتى السفر ؟ غدا إن شاء الله .. ودندن .. خايفة لما تسافر على البلد الغريب تنسى إنك فايت في بلدك حبيب .. ما تخافش فمهما اغتربنا ومهما ابتعدنا فالوطن يعيش بداخلنا هو هوانا الذي نستنشقه هو الفرحة والبسمة والأهل والولد .. هو أحزاني وآلامي وهمومي .. يكفي أن عند عودتي أتلهف له شوقا لهفة المحب لحبيبه .. ولن نسلوه أبدا مهما حاولوا تغريبنا داخل أوطاننا .. في المطار انتظرت مع المنتظرين لحين دخول الطائرة .. على السادة المسافرين على الرحلة رقم 777 التوجه لبوابة السفر رقم 7 .. واصطف الركاب والراكبات لدخول الطائرة ودخل البعض .. ثم انقلب المطار رأسا على عقب .. ورتب بسيوف متقاطعة ونسور ودبابير هنا وهناك وأجهزة لاسلكي تصدر أصوات كأنها حشرجة الموت .. وتم إخراج الركاب من الطائرة مرة أخرى .. ماذا يحدث ؟ وشك حلو يا لطيف !! .. قالوا : أجهزة التكييف في الطائرة معطلة وسيتم إصلاحها .. وما العلاقة بين جهاز التكييف وقيادات الأمن بالمطار ؟ .. وانتظرنا أكثر من ساعتين .. ثم عاودنا الصعود إلى الطائرة مرة أخرى .. وأقلعت الطائرة وتشبثت بالمقعد في لحظة أحسست فيها بروحي تنسل من بين أضلعي ويقتلني الخوف .. ويزيد خوفك شرح تسجيل صوتي يتزامن مع حركات للمضيفات بلغة الإشارة ( قبل وجود أجهزة الرؤية التليفزيونية المتواجدة حاليا على الطائرات ) تشرح كيفية الخروج من الطائرة عند الطوارئ وكيفية ارتداء سترة النجاة عند الهبوط فوق الماء .. استر يا رب .. وأجمل ما رأيت منظر رائع للسحب من أعلى وعن قرب كانه موكب لعروس في السماء يطوف .. وبدأت المضيفة في توزيع بطاقات بيانات نملئها وتسلم في الجوازات عند الخروج من المطار .. وسألتني المضيفة مصري ولا .... قلت لها مسلم .. فنظرت لي باستغراب .. قلت لها مسلم مولود في مصر .. فأعطتني بطاقة المصريين ..
وجاء وقت الوجبة الغذائية .. لحمة ولا فراخ ؟ قلت لها لحمة .. وتبادر إلى ذهني وجبة مشبعة .. ولكن خاب ظني فقد كانت عينات للتذوق أكثر منها وجبة .. ولكن كيف ستأكل في هذا الجو بالشوكة والسكين وأنت لا تعرف غير ودن القطة !! ودن القطة لمن لا يعرفها يا مبارك هو جعل قطعة الخبز على شكل أذن القط حتى تستطيع أن تغمس بها .. أما الشوكة فلم استخدمها من قبل إلا عند تناول المكرونة الاسباكتي .. وكانت تسبب لي مشكلة أيضا .. إذن انت لازم تتعلم الكتاكيت قصدي الإتكيت حتى تعرف كيف تأكل وكيف تشرب وكيف تتكلم وكيف تعامل الناس وكيف تمشي .. وعلمني الكتاكيت ...
في اليوم التالي للوصول وفي جريدة الأهرام .. عامل النظافة بإحدى الطائرات بمطار القاهرة يعثرعلى ورقة مكتوب عليها توجد متفجرات بالطائرة مما تسبب في تأخير الرحلة لأكثر من ساعتين ..
إلى لقاء آخر من على متن الطائرة 777 .....

هناك 77 تعليقًا:

عصفور المدينة يقول...

ممتع مضحك مبكي

جنّي يقول...

عصفور المدينة
شرف عظيم لنا زيارتكم وتعليقكم
وآمل دوام التواصل ..

قلمي يقول...

قصه حلوه فكرتني بالسفر بالطياره وبصراحه اكثر شيء كان بيعجبني في الطياره وانا في سن صغير الوجبه و البنبون او لبان الي بتديهولي المضيفه اول ما الطياره بتطلع :)وهي راسمه ابتسامه بايخه من وجهت نظري


في انتظار باقي القصه
وياريت تشرفني في مدونتي الجديده اصلي غيرت العنوان وفي انتظار تشريفك لي

Unknown يقول...

اخي الحبيب
ربنا يحفظك ويبارك فيك
نعم اخي لربما كانت النظرة بين الناس في عالمنا العربي الرائع هو كيف تمسك الشوكة والسكين وكيف تمسك الكوب وهل تشرب العصير بالشاليموا ولا لا,وهل يمكن ان تأكل ودن قطة وكيف ترتدي القميص والبنطال وهل انت من مستخدمي الشاور ام الصابون العادي!!
ولكن التعليم والبحوث والمناهج العلمية والقضايا القومية والكوارث الغير طبيعية
تجد الصمت او تعبيرات الوجوه التي قد تصيب بلبلاهه فتؤدي الي الصمت
ومن القصة نعرف لماذا امتنا تعيش في تخلف
وعندما يصبح راتب رجل العلم ربع راتب الراقصه او الفنان او المخنث الفلاني وقتها يمكن ان نكون علي اول الطريق
ممكن او احتمال
وجزاكم الله كل خير اخي الحبيب

Mohammed يقول...

مدونة جميلة جدا ومميزة
فرحت جدا لما عرفتها
مش هقولك مبروك
بس حقول مبروك لينا عالمدونة دي
رغم اننا طلعنا كلنا مبتدئين تدوين فحبيت امشي بمثال
عالاصل دور <-----

تقبلي مروري

خمسة فضفضة يقول...

السلام عليكم ورحمة الله وبركاته


امتي فعلا يجي اليوم ده اللي تكون فيه جنسيتنا هي الاسلام ؟؟

تعرف حضرتك اني ماقدرش ازور اختي في بلد عربي مسلم لا بفصل بينها وبينا الا سويعات قليله بالسياره
لاني ماعنديش تاشيرة مرور ولا ليا كفيل

بجد مهزله

سلام

Jana يقول...

بما ان الرغيف دلوقتى يصنع بالكاد أربع ودان قطة ...غير ودن قطتك تماما من 8 سنوات
يبقى لازم فعلا نتعلم كلنا الكتاكيت

مسلم مولود فى مصر
او مسلم مصرى
تمنيتها تبقى كده من زمان بدل التعريف ب مصرى مسلم

طبعا لو كانوا قالولكم الحقيقة بدل اختراع عطل التكييف ..كنت رجعت فورا وكانت ضاعت عليك الوجبة ..شفت الميزة !!؟
:))))
تدوينة جميلة
فى انتظار البقية

حرة المداد يقول...

سلام الله عليك سيدي: ضحكت وشر البلية ما يضحك !وأعجبتني جدا هذه الخواطر التي جمعت بعض هموم الوطن والمواطن في طياتها الساخرة وشعرت أثناء قراءتها بمتعة...متشوقة لمعرفة البقية.دمت بخير

shaimaa samir يقول...

تختفي فيما بينها الحدود وتكون هويتي ( جنسيتي ) هي إسلامي

الله
ما اجملها من جملة
بوركت


نعود للقصة
واقع مؤلم
وضعته فى بوتقة الضحك حتى لا تضغط علينا ...
انتظر الباقى بفارغ الصبر
واعادك الله لاحبابك
ووفقك لما يحبه ويرضاه

جنّي يقول...

قلمي
السلام عليكم
شكرا على مرورك الكريم وتعليقك
والبنبون واللبان لمعادلة الضغط على الأذن ..
وسأمر على مدونتك إن شاء الله

جنّي يقول...

الفاتح الجعفري
السلام عليكم
شرفتني بزيارتك الكريمة أخي الكريم
وجزيت خير الجزاء على تعليقك المميز
للأسف النظرة السلبية لرجل العلم والمعلم نظرة عامة في كل وطننا العربي
شكر الله لك

جنّي يقول...

relove

أهلا بيك زائر وصديق جديد للمدونة
وشكرا على تعليقك الجميل وكلماتك
وآمل دوام التواصل

جنّي يقول...

خمسة فضفضة

وعليكم السلام ورحمة الله وبركاته
شكر لمرورك الكريم
في الوقت الذي يزيد فيه التقارب بين دول الغرب بعملة موحدة وبلا حدود .. يزداد العرب بعدا ..
ولكننا نأمل في رحمة الله وتزول هذه المهزلة ..

جنّي يقول...

جنى الجنتين
السلام عليكم
أهلا بمن تذكرنا بالجنة
وشكرا على مرورك الكريم وتعليقك الرائع
بالنسبة لعطل التكييف المصطنع حاجة كويسة ولكن الناس تشك في الأمر عندما ترى هذا الكم من رجال الأمن ..
القصة القادمة ستجدين كذبة رعناء من طاقم الطائرة في رحلة أخرى .. لن اذكرها حتى لا أحرق القصة ..
كوني معي لترين ماذا حدث ..
تحياتي

جنّي يقول...

حرة المداد
وعليكم السلام ورحمة الله وبركاته
شكر الله لكي زيارتك الكريمة وتعليقك الممتع
من مميزات الشعب المصري الأصيل أنه في شدة الحزن يضحك ويلقي نكتة لعله يجد فرحة تقلل من كم الهموم التي يحملها على كاهله ..
البقية في الطريق إن شاء الله

جنّي يقول...

الشيماء
سعيد جدا بزيارتك رغم انشغالك بالامتحانات ..
كفاية الهموم والأحزان التي يرسمها الحزب الوطني ( اللي هو لا وطني ولا حاجة )على وجه مصر الحبيبة .. فلعلي اقتنص منكم ابتسامة في زمن الطوارئ السرمدية المباركية ..
شكرا لدعواتك ياشيماء أكرمك الله وأعزك
الباقي في الطريق إن شاء الله فكوني معي ..

سلوى يقول...

3 سبعات يا سيد

لو حد من المجمين قرأ بوستك

هيقولك أهوال

:)

بوست جميل يا سيد
متسلسل كده ومش تحس به

في انتظار البقيه
وربنا يستر

:)

جنّي يقول...

سلوى
نورتي المدونة استاذتي في الكمبيوتر
هما اربع سبعات .. نسيتي رقم بوابة الخروج رقم 7
شكرا لمرورك مع انك تاخرتي ولكن السماح من طبع الملاح ..
شكرا والبقية في الطريق
فكوني معي

إخوانى حتى النخاع يقول...

السلام عليكم


ازيك يا حبيبى .. معلش اتأخرت علشان كان عندى إمتحانات ولسا مخلص انا


بجد قصة حلوة .... وعلى حكاية الدروس الخصوصية


كل المدرسيين بيدوا يا حاااااااااااج


ويا رب يكون يوم من الأيام ويقولوا أنا معايا جواز سفر مسلم


شكراا ليك يا حبيبى وبوووووست هااايل

اخووك

جنّي يقول...

اخواني حتى النخاع

وعليكم السلام ورحمة الله وبركاته
أهلا بيك وبالتوفيق إن شاء الله وربنا معاك ..
أنا والله لم اععط دروس خلال السنوات التي عملتها في مصر ..
في حياتك إن شاء الله يكون هناك جواز سفر إسلامي ربنا يديك طولت العمر ..
تحياتي

موناليزا يقول...

كان نفسى اسافر بالنهار عشان اشوف السحاب لكن فى كل مرة كنت بسافر بالليل
الوطن يبقى فى الدم دائما ولكن مع مرور الوقت يصبح ذكرى ويوم ماترجع وتشوف المساوئ وتقارن هتفضل ترجع هناك

جنّي يقول...

الموناليزا
سيظل الوطن واقع دائما مهما شوهوا وجه مصر البهية الرائعة بحكم ظالم جائر وحزب فاسد وقانون كريه الرائحة هو قانون الطوارئ ..
ستظل مصر هي مصر .. ومصير هؤلاء الذين غربونا داخل أوطاننا إلى سلة زبالة التاريخ ..

.:.-=- ELGaZaLy-=-.:. يقول...

مرحبا بك فى نادى الغربة يا سيد العزيز

كل ما ستراة عينك من الان اى شئ الا تراب هذا الوطن لذالك حضر نفسك منذ ان تصعد الى الطائرة لكى ترتشف غربتك

بس عارف يا سيد برة الدول العربية بجد الاسلام جنسية..سيبك من الغجر مدعو القومية ...بجد فى ناس كتير اوى اوى يعنى... لو بتصلى فى الجامع بتقابل مليون مسلم من مليون جنسية وكلهم بيفرحو انك مسلم... وبيساعدك من غير اى سبب

اوعى تفكر يقول...

شر البليه ما يضحك
المهم مبرووووووووك السفر
وعقباى ان شاء الله

صبرني يارب يقول...

ايه ده حرام عليك يا جني ده الاكل بتاع الطياره بيبقى كتير

انا افتكر عمري ما خلصت الاكل كله الا مره واحده
اول مره ركبت فيها الطياره كنت مسافره عروسه وعشان اسافر كده صحيت من الساعه 8 صباحا عشان يادوب اوصل المطار الساعه 7 مساء وكنت باعيط بقى عشان مسافره وسايبه اهلي فما عرفتش اكل . بس لما وصلت الطياره كنت هاموت من الجوع بصراحه كان يوم بهدله جامد اكلت ا لوجبه كلها والمضيفات كان متوصيين بيا كل شويه يجبولي مشروبات عرووووووسه بقى
وجه عمو الطيار سلم عليا وباركلي واتأسفلي انه مافيش امكانيات يحتفلوا بيا اكتر من كده لانه كان طيران الخليج وانا راكبه من القاهره طبعا .
بس انا ما كنتش خايفه انت الى خواف شكلك يا جني .

على فكره لفيت شويه فى المدونه بتاعتك عجبنى اوي البوستين بتوع عباد الرحمن ربنا يجعلها فى ميزان حسناتك

ومت من الضحك على البوست بتاع دكتور السنان انا ليا معاهم بااااااع طويل .

وعلى فكره عليك لنا نص كيلوا رز لان انا قعدت اقرا فى المدونه بتاعتك لحد ما الرز اتحرق .

جنّي يقول...

الغزالي
شرفت ومنور دايما
فعلا لو كانت الغربة إمرأة ما نظرت إليها أبدا..
عندك حق قابلت من الجنسيات الإسلامية الكثير .. وقليلا ما تكون اللغة عائق في فهم بعضنا البعض لأنهم يتعلمون اللغة العربية بسهولة بفضل القرآن الكريم ..
تحياتي وشكر الله لك

جنّي يقول...

أوعى تفكر

شرفت المدونة وأهلا بيك صديق جديد للمدونة ..
الله يبارك فيك وعقبالك إن شاء الله
وأهلا بيك دايما
تحياتي

دعاء مواجهات يقول...

كان الله فى عونك وفى عوننا جميعا

لنا الله

بس اوعى يكون وشك فعلا

تبقى مصيبة

عزماك عندى ع عصير فى البوفية

سلاااام

جنّي يقول...

صبرني يارب

أخيرا نلت شرف الزيارة والمرور الكريم
ومش عارف ليه المدونة منورة النهاردة مع إني موجود كل يوم .. أتاري صبرني يارب بتاخد لفة في المدونة .. لو اعرف كنت حضرت التوكتوك ولا الطفطف ..

المهم دائما المسافر بيحس بالشبع بسبب انقباض عضلات المعدة لذا يخيل إليه كبر كمية وجبة الطيارة .. بس كانت بالنسبة لي مسح زور ..
وأنا في مثل هذه الأماكن أتقمص دور ابن عز( لا مش علاء الله يرحمه ) اللي عينه مليانة فلا اطلب شئ إلا إذا عرض علي ..
كنت بافكر أطلب كمالة وبعدين قلت بلاش طفاسة هو أنا في محل كشري ..

أنا خواف !! أمال لما تشوفي زميلي عم سيد ها تقولي ايه مش ها احرق القصة كوني معي عشان تشوفي عم سيد بيحصله ايه في الطيارة ..

الحمد لله إن مواضيعي عجبتك وهذا شرف لي وأتمنى أن أكون عند حسن ظنك بي ..

1/2 كيلو رز بسم الله ماشاء الله اللهم لا حسد باين عليكو ارستقراطيين وعندكم تطلعات طبقية برجوازية ..
وليكي عندي 7 كيلو رز بسمتي هندي علشان الكبسة ..
بس لما تيجي المدونة تفضي نفسك خالص علشان ها تنسي كل حاجة ومش ها تقدري تغمضي عنيكي ..

باين عليا اتعديت يا جدعان وبقيت رغاي .. من جاور السعيد يسعد ..

بجد شرفتيني واهلا ببيكي دائما ..

جنّي يقول...

دعاء مواجهات

شرفتي المدونة وأهلا بيكي صديقة جديدة للمدونة .. وأهلا بكل المنايفة فأنا لي صولات وجولات في شبين بعدين نحكي عنها ..

أنا ما اسميش لطيف .. ولما تقرأي القصة القادمة ها تقولي ايه خليكي معايا .. علشان تعرفي اللي حصل ..

بس أنا عايز عصير ( خربز ) لوعرفتيه ها اعزمك على كوكتيل فواكه ..

سلام

الفاتح اليعقوبي يقول...

السلام عليكم
استاذنا جني ربنا يوفقك في غربتك ويغنيك بحلاله عن حرامه ويغنيه بفضله عن من سواه

ولكن لي راي في حكاةي الدروس الخصوصية
ايه المشكلة فيها طالما انك تؤدي دورك في المدرسة علي اكمل وجه ودروسك حدد لها عدد محدد يوميا او اسبوعيا وفقط رخص الفيزيتا مراعاة لظروف الشعب
ماعندك الدكاترة بيشتغلوا في مستشفيات ولهم عياداتهم برضه
وعامة يااستاذي طالما ان المرتب لايكفي فايه المانع في الدروس الخصوصية
والسلام

عاشــــــ النقاب ـقــــة"نونو" يقول...

السلام عليكم
دة حصل بجد لحضرتك ولا ايه؟؟؟؟
انا برضه بحلم بجواز سفر اسلامي
يارب ترجع بالسلامة وفي انتظار المزيد
تحياتي وتقديري

جنّي يقول...

الفاتح اليعقوبي
السلام عليكم
اسمح لي بتأجيل الرد حتى المساء لأني في العمل الآن لأن تعليقك هام جدا ومحتاج رواقة في الرد ..
سلام مؤقت

جنّي يقول...

nonoymm
عاشقة النقاب
وعليكم السلام ورحمة الله وبركاته
اهلا بأختنا الكريمة أكرمك الله على هذه الزيارة الكريمة ..
فعلا هذا حدث لي بالفعل وبنفس التفاصيل ولكن منذ فترة ولا زلت مسافرا ..
وإن شاء الله يتحققك حلمنا جميعا ..
سلمك الله وهناك المزيد إن شاء الله فكوني معي ..

المتحرش بها يقول...

بوست ممتع فعلا

Unknown يقول...

جنى
بوست هايل شدنى جداا
الحلم العربى المفقود
الجنسية عربى مسلم وحلمك بمهنة الانبياء على ارض وطنك :( للاسف المرتب لا يغنى ولا يسمن
كما قال عصفور المدينة
مضحك مبكى

كل الاحترام
بجد بوست هايل

رئـــــيسـة حزب الأحلام يقول...

واتعلم الكتاكيت ولا لسة لما تتعلمة
انا كمان عاوزة اتعلمة
تحياتى لك

جنّي يقول...

المتحرش بها

أهلا بيكي صديقة جديدة للمدونة وعالم التدوين وشكرا على تعليقك

جنّي يقول...

الريحانة

أهلا بيكي وألف سلامة
شكرا على تعليقك
وإن شاء الله الحلم يتحقق
من اسباب فشل التعليم في مصر النظرة الدونية للمعلم والمرتب الضعيف
مرة تانية حمدا لله على سلامتك

جنّي يقول...

رئيسة حزب الأحلام

أهلا بيكي وشرفتينا
لم ولن أتعلمه طالما لي خمسة أصابع واستخدم ثلاثة منها هذا بالنسبة للطعام ..
أما إذا كنتي تريدين تعلمه فالحصة الواحدة بخمسة جنيه !!!

جنّي يقول...

الفاتح اليعقوبي

أهلا أخي الكريم

شوف ياسيدي بالنسبة للدروس الخصوصية أولا أنا لم أمتنع عنها تحريما .. وفكرتك جميلة ورأيك ممتاز على أن لا تتحول الدروس الخصوصية إلى تعليم موازي أفقد التعليم الأصلي مضمونه وخرب المدارس حتى اضحت المدارس بالصورة التي نراها الآن ..

لقد غضت الحكومة الطرف عن الدروس الخصوصية متعمدة وأصلتها وتحاربها كذبا وخداعا حتى تعلق فشلها على كاهل المعلم ..

لقد أفسدوا التعليم بشكل مقنن خلال سنوات حسين كامل حتى اوصلوه إلى مانحن عليه الآن .. واشترك معهم المعلمون فاقدي الضمير وللاسف الشديد فهم كثر ..

والمعلم الذي يعطي المدرسة فائض وقته وجهده ويوفر كل جهده للدروس الخصوصية فماذا نسميه ؟

مدرس الرياضيات الذي يدخل الفصل ولا يكتب كلمة أو حرف واحد على السبورة فماذا نسميه ؟

مدرس زميل لي سالته لماذا لا تشرح في الفصل كما كنت من قبل ؟ فقال لي الطالب لا يريد !! فالطلبة كلهم في الدروس ويحضرون للمدرسة خوفا من الفصل ..

المدرس الذي يحضر الحصة ويأخذ الكرسي ويجلس على باب الفصل يدخن السجائر ولا مانع أن يعطي للطالب خمسة أو حتى سيجارة كاملة فماذا نسميه ؟

الدروس الخصوصية أنتجت جيل من الطلاب يفتقد التفكير والابتكار والبحث بسبب تحويلهم إلى آلات للحفظ الأصم حتى أن كثير من الطلاب يحفظ المسائل الرياضية ..

الدروس الخصوصية انتجت التفوق الوهمي الذي نراه في المجاميع المرتفعة بشكل يثير الاستغراب والذهول ثم نجد جامعاتنا في ذيل ترتيب جامعات العالم وتتفوق علينا إسرائيل بمراحل ..

وهناك الكثير من الأمثلة عايشتها بنفسي كرهتني في الدروس الخصوصية لأنها وبكل بساطة ساهمت بشكل كبير في إفشال المنظومة التعليمية والتربوية ..

المعلم قدره كبير جدا ولكن أوقعته الحاجة نظرا لتدني مرتبه في بئر الدروس الخصوصية ..

وهناك فرق بين عمل الطبيب وعمل المدرس ..

أخيرا لو كانت الدروس بالشكل الذي أوضحته لي في تعليقك فما وصل بنا الحال في التعليم إلى هذا الحد .. ولكن معظم المعلمون يتناولون الدروس الخصوصية بشكل آخر تماما هو الشكل السئ ..

تحياتي سيدي الفاضل
شلكي دوشتك وصدعتك شوية معلهش سامحني ..

جمعاوى يقول...

ربنا يسامحك يا عمنا

أنا لسه مخلص إمتحانات ألو إمبارح

تدريس برده ..!!!!!.

كلام على بلاطة يقول...

وجبة الطائرة على الرغم من انها عينات لكنها وجبة دسمةوصعب تقدر تاكلها لانها متنوعة
ويكفى انها ب8 دولار
تحياتى

جنّي يقول...

جمعاوي روش طحن

أهلا بيك صديق جديد للمدونة
ربنا يسامحنا كلنا ..
وبعدين هاتروح فين ما انت مدرس مدرس

جنّي يقول...

كلام على بلاطة

أهلا بيك صديق جديد للمدونة
مرة سألوا واحد بياكل بإخلاص وبقلب جامد .. كل على السنة يعني خلي ثلث المعدة للطعام وثلث للشراب وثلث للتنفس .. فقال : كل واحد أدرى بثلثه
وبعدين شكلك مع مصر للطيران .. تعرف أن سعر تذكرة الطيران من القاهرة لدولة من دول الخليج أكبر من سعرها للندن وغيرها من دول أوروبا..
وتقريبا تساوي سعر التذكرة من دول الخليج إلى إندونيسيا والهند مع فارق المسافة الكبير..
مرحبا بيك

Empress appy يقول...

اه على الطيران واللي حصلي فيه وخاصه مصر للطيران ومخيفات مصر للطيران هههههههههههه بجد بحس هيضربونا وهما بيدونا الحاجات

جنّي يقول...

appy
نورتي الدنيا يا صاحبة الكوكب
عندك حق المضيفات فعلا كده أحيانا ..
لكن بصراحة الطيارين المصريين في منتهى الاحترافية ..
مرة كان الطيار أجنبي في شركة طيران أخرى وعند اللاندنج وقع قلوبنا ..
لكن الطيار المصري كثيرا جدا لا نحس بالهبوط ..

""""" يقول...

مش قادره اقولك اد ايه استمتعت بقراية البوست ده

وحلوه اقسمت الا يكون
الارزاق على الله فعلا

اللى عايز يفتح بيت يتوكل على الله وربنا هيرزقه ويعينه

دا الجواز نص الدين
اكيد ربنا بيسهلهم طريقهم

اسلوبك حلو اوى بجد :)

جنّي يقول...

amal
شكرا امل على زيارتك وتعليقك

وفعلا الرزق بيد الله ..
ولكننا نتعجل ..
والحمد لله على ما أنا فيه من خير ..
{إِنَّ مَعَ الْعُسْرِ يُسْراً }الشرح6
ولن يغلب عسر يسرين ..
لقد أخذ الله تعالى على نفسه عهدا أن يساعد الناكح ( الذي يريد الزواج ) طالبا العفاف ..

المتحرش بها يقول...

الشباب اللى مش بيشتغلو دى مشكله شعب بحاله
والشباب اللى بيشتغل كدة وكدة والمقصود بيها اللى بيشتغل لكن بمرتب لا يناسب عمله كتير يعنى مش فى الهم لوحدك يا صديقى

ahmd ebn om ahmd يقول...

السلام عليكم

إنت الحقيقة ولابنت عمها

خلينى أقول بنت عمها أحسن أول مرة أدخل عندك التدريس حلو (طبعاً دى بنت عمها عشان أنا طالب ولسه مخلص إمتحانات)

ولا أقولك أنا حأقول الحقيقة وأريح ضميرى

التعليم عمل نبيل وفعلاً من أعمال الأنبياء لكن إنت شايف إن المناهج اللى الطلبة بيدروسها دى مناهج تبنى جيل
متعلم يتقدم بمصر بص أنا طالب وبدرس المناهج دى و بقول إن أنا مش بأستفيد
من المناهج دى يمكن ده حاجة عندى أنا
بس إسأل أى طالب وحيقلك نفس الكلام

طبعاً أنا الحاجة الوحيدة اللى مصبرانى
إن "أم أحمد " مدرسة عشان كده بيوصلى تعبيرات المدرسين المتضايقة من كل حاجة
--------------------------------
وحلوة حكاية تبقى الجنسية مسلم ولد فى مصر حلوة وأنا أؤيدك بشدة
------------------------------
وأتمنى إن حضرتك تشرفنى فى مدونتى

Jana يقول...

حقا ..عاجزة عن الشكر
كنت قد سمعت هذه الاغنية قديما بالصدفة
ثم قتلت النت بحثا عنها ..ولم افلح ابدا
فاذا بى أجدها هنا ..هكذا بتلك البساطة
!!!!!!!!!!
جزيل الشكر والامتنان
حقا ..المصباح يحمل جنيا
:)
تحياتى وتقديرى

مصر اللى مشفتهاش يقول...

أستاذ سيد..
السفر قطعة من العذاب ..فهل فضلتها على الدروس الخصوصية ....؟؟

انا مش ضد السفر بالعكس السفر فيه فوايد كتير جدااا بس مايبقاش غربة والأهل ما يشفوش بعضهم غير كل سنة مرة او يمكن كمان اكتر من سنة ..

بس أنا ضد رفضك لإعطاء الدروس الخصوصية .. يعنى لو جالك طالب وقالك عايز درس ورفضت هيروح لمدرس تانى وياخد منه ضعف اللى كنت انت هتخده .. موضوع الدورس خلاص أصبح شئ عادى والاصلاح فيه مش انك ترفض الدروس..

بوست جميل .. وان شاء الله بيكون سفر فيه كل الخير ..

جنّي يقول...

المتحرش بها

أهلا بيكي ونورتي المدونة
البطالة قنبلة موقوتة ربنا يستر منها ..
وإن شاء الله ربنا يخرجنا من هذا الهم جميعا ..

شكرا لحضورك
تحيتي

جنّي يقول...

ahmd ebn om ahmd

أهلا بيك صديق جديد للمدونة وآمل دوام التواصل ..

لا يوجد أحد سوي يكره الحقيقة علشان كده انا ما بحبش لا بنت عمها ولا بنت أختها ..

( ياريت تقرأ ردي على الأخ الكريم الفاتح اليعقوبي في هذا الشأن _ أنظر أعلاه _ )

العملية التعليمية برمتها تحتاج تطوير ولكن من أناس يتجردون ويعملون لصالح البلد وليس تنفيذا لأجندة صهيوأمريكية ..

التطوير يشمل الطالب والمعلم بتغيير مفهوم التعليم وأهدافه لديهم ..
التطوير يشمل نظم التعليم منهجا وطريقة ..
وانت وكل الطلاب لا تستفيدون بسبب طرق التدريس التي عفا عليها الزمان .. لا تستفيدون بسبب رؤيتكم للمناهج التي يجب حفظها ثم استرجاعها يوم الامتحان ثم تتبخر سريعا ..

شكرا يا أبو حميد على الزيارة

جنّي يقول...

jana

المدونة نورت وتحت أمرك فقط كلك شمال تجدي جني المدونة أمامك .. المكتبة بها الكثير .. اطلبي ما تشائين تجدي ما يسرك .. بجد جربي ..

النت والسيرفر كان عامل عندي مشكلة والسبب انتي اللي قتلتي النت ..

لكي الشكر والتحية

جنّي يقول...

Aeesha Hamdy

فعلا السفر قد يكون العذاب نفسه غربة ووحدة ..
لكن بعد ثمان سنوات عمل مدرس في مصر لم أجد ثمن تذكرة الطائرة .. وبمقارنة بسيطة بين السفر والدروس الخصوصية اخترت أخف الضررين وفضلت السفر ..
بالنسبة لرفضي الدروس الخصوصية فأنا لا أرفضها تحريما ( وكامل رؤيتي لها تجدينه في ردي على الأخ الكريم الفاتح اليعقوبي على نفس البوست )
شكرا وامتناني

Gannah يقول...

ما فيش اسهل من الكتاكيت بس الاحسن انك تكون على طبيعتك و تاكل باى ودن تعجبك.
الاستعمار نجح فى تقسيمنا و لم ننجح حتى الآن ان نجتمع
انا فى المدينة المنورة و الحمد لله فعلا هنا الجنسية هى الاسلام و المسجد النبوى ترى فيه كل الجنسيات و تسمع كل اللغات و اللهجات و بصراحة برغم انى بحب بلدى لكن لا اتمنى ان اعود اليها
الغربة تجربة فيها كل التناقضات بس فى النهاية ممتعة برغم كل شىء
ربنا معاك
تحياتى

جنّي يقول...

gannah

نورتي المدونة وشكرا لزيارتك وتعليقك ..

أنا فعلا على طبيعتي وباكل بكل ودن حتى لو كانت أكبر من ودن القطة ..

لقد ساعدت دولنا بالمشاركة مع المستعمر على هذا التشرذم والأنانية والإنقسام ولكن إن شاء الله الإتحاد قادم..

بالله عليكي إذا زرتي قبر النبي صلى الله عليه وسلم وفي الروضة الشريفة ادع لي بزيارة حبيبي رسول الله صلى الله عليه وسلم فقد مر عامان ولم أزره ..

أنا عارف إن رغبتك في عدم العودة من وراء قلبك وستحني يوما ما للعودة ..

تحيتي

دنـيـا محيراني(ايناس لطفي يقول...

تحمل لنا دائما بوستاتك فكر راقي و احلام جميله حتي و انت تسخر من الحال
ربنا يبارك فيك عايزين نعرف بقي لما سافر عمل ايه هناك و الدنيا مشيت ازي و لسه فضل جواه حلم الجواز الاسلامي العربي كملها بجد وقولنا
تحياتي

نسر الشرق يقول...

السلام عليكم

دى اول زيارة ليه فى هذة المدونة

هذة المدونة جميلة الرقيقة التى دمها

شربات

سلاااااااااااام

نسر الشرق

ammola يقول...

طيب ما احنا أغراب فى بلدنا برضة
وبعدين الكتاكيت برضة مش وحشة..يعنى لو حتدى مظهر الطف مش وحشة
بس بلاش الشوكة فى الشمال والافلام دى
:)
عارف ..دى غلطتهم انهم ما وزعوش عليكو ودن القطة..بس يمكن علشان ممنوع اصطحاب الحيوانات على الطائرة؟
:)

أم أحمد المصرية يقول...

صديقي جني
اولا السلام عليكم و رحمة الله
ثانيا اسفه جدا علي الخطا اللي حصل في حرف التاء انا كنت فكراك صديقة جديدة اسمها jana
و ادركت الان ان اسمها انجليزي و اسمك عربي
سامحني دا انت حتي زميل
اما هذه القصة الميلة فهي واقعية لدرجة اني متهيالي انها حصلت بجد

wael يقول...

واقعنا المرير مش عارف اضحك ولا اقوم الطم
على العموم سيظل هو ده اللي احنا فيه

Unknown يقول...

من مدرس لمندوب مبيعات!!!

اممممممم

شيء محزن ان التدريس مش مُقدر في البلد دى تماما

ممكن تكون مقتنع برسالة التعليم...بس الواقع شر مثبط

لقد اسمعت لما ناديت حيا.....ولكن لا حياة لمن تنادى

رحمة الله علينا معشر التربويين...في طريقنا للانقراض

جنّي يقول...

دنيا محيراني

الأخت الفاضلة إيناس
أهلا وسهلا المدونة نورت
شكرا على تعليقك الجميل وهذا من ذوقك
وأتمنى أكون عند حسن الظن بي
البقية قادمة إن شاء الله فكوني معي
ومش بس بنحلم بجواز سفر إسلامي وإن شاء الله بعملة موحدة أيضا
شكرا وتقبلي تحيتي

جنّي يقول...

نسر الشرق

أهلا بيك صديق جديد للمدونة وآمل دوام التواصل ..
شكرا على رأيك في المدونة اللي دمها شربات ..
شكرا وأهلا بيك دائما

جنّي يقول...

ammola

لن يستطيعوا تغريبنا في أوطاننا .. هذا ما ذكرته في التدوينة ( البوست )فما أقسى أن نحس بالغربة في أوطاننا ..
لم ارفض الكتاكيت قصدي الإتكيت .. والنبي صلى الله عليه وسلم أول من علمنا طريقة تناول الطعام : ( عن عمر بن أبي سلمة يقول :
كنت غلاما في حجر رسول الله صلى الله عليه وسلم وكانت يدي تطيش في الصحفة فقال لي رسول الله صلى الله عليه وسلم يا غلام سم الله وكل بيمينك وكل مما يليك فما زالت تلك طعمتي بعد )صحيح البخاري
وكما قلتي بلاش الشمال
شكراعلى تعليقك الرقيق وأهلا بيكي دايما

جنّي يقول...

أم أحمد المصرية

أهلا يا أستاذة والمدونة في غاية الفرح والسعادة ..
ما في داعي للأسف فأنا كنت أنوه فقط ..
والقصة فعلا حقيقية وحصلت بتفاصيلها..
شرفني حضورك انت وأحمد ..
وآمل دوام التواصل

جنّي يقول...

wael

أهلا بيك وشرفت المدونة
وتفائل يا أخي فدوام الحال من المحال
شكرا وأهلا بيك دائما

جنّي يقول...

حطم القيود

شرفتي المدونة ..
كان هناك مدير للمدرسة إذا حدثت مشكلة للمدرس يقول هي دي الضريبة اللي بندفعها ..
ولن ينصلح حال أمتنا إلا بإصلاح التعليم .. ولن ينصلح حال التعليم إلا بإصلاح المعلم والمناهج ..
شكرا وأهلا بيكي دائما

غير معرف يقول...

هو فعلا ركوب الطياره متعه وانا صغير

بس دلوقتى ممكن قلبى يوقف

يلا السن باه ليه حكم


مدونة رائعه

كلامك سلس وممتع

جزاك الله خيرا

الباحث عن الحقيقة يقول...

طب والله العظيم جيت وكتبت تعليق وبعته
وانا والله مستغرب جدا اني مش لاقيه
حتى بالامارة قلت اني مش فاهم حاجه
مفيش غير بقى ان النت فصل وانا ببعته
بس والله انا فاكر اني بعته ومش فاكر ان النت فصل
شفت ..
جايز هو ده السبب
قريته يا عم تاني
ولغاية دلوقتي معرفش هو انت سافرت ولا لسه
اتجوزت ولا لسه
مش انت اتجوزت يا عم
هو انا الاحداث في دماغي
انما مش عارف ايه علاقتك بيها
هههههههه
اعمل معروف الجزء التاني حاول تكون واضح حبتين
واعذرنا يا باش
بس والله جيت
انت مدونتك دي لما بتجوع بتاكل التعليقات ولا ايه
معلش ..مصدع بقالى كام يوم والحر في اسيوط فظيع
ألحقنا بالموضوع اللى بعده اعمل معروف
عايز افهم علشان اعرف اتكلم
وما تزعلش يا ابو السيد
انت غلاوتك في القلب مش التعليقات

الباحث عن الحقيقة يقول...

الحمد لله
اتبعت وشوفته
اياك المدونة تشفطه زي اللى فات
انا ابويا مره طلع من جيبة كيسين كده زي شريط البرشام
قال ايه طلعوا كيسين سكر
وكيس زيهم كريمر
ايه كريمر ده مش عارف
انا حطيته ع الشاي بقى عامل زي الشاي ابو لبن
بس طعمه مكنش حلو
حتى السكر مكنش حلو
كيس بس ..منظره يعني
ومن جوه سكر عادي الفتفوته أد الزلطه

الباحث عن الحقيقة يقول...

بقولك ايه تاخد تعليق التدوينة الجايه دلوقتى بالمره
محدش يضمن الظروف يا ابو السيد

جنّي يقول...

الباحث

كويس إنك جيت لأني كنت ناويلك على نية بيضة ..
وانت كنت بتعمل أيه في أسيوط سياحة ولا أنت أبو خالو ..
ياعم الحاج أنا في منتهى الوضوح .. فهذه التدوينة أحداثها حدثت بالفعل منذ فترة ولم أقل إنها حدثت اليومين دول ..
حرقت حكاية الكريمر ..
المهم الموضوع الثاني بعد قليل هايكون موجود ..
وبرضه ناوي تزوغ بالتعليق المقدم وبكرة تعملي تعليق بالقسط ..
بس ياريت تشوف الأخت مجداوية زعلانة ليه ؟

بيكيا للبيع يقول...

رديت عليك هات الهديه فى ايدك هو انا هسيب شغلى واقعد احل فوازير ولا ايه هههههههههههههههههههههههه يعنى لو فوت شيكولا اوك معنديش مانع